Farg‘ona davlat universitetining missiyasi:
Bizning missiyamiz – ta’lim, ilmiy-tadqiqot va ma’muriy
boshqaruvning barcha yo‘nalishlarida yuksak sifat madaniyatini shakllantirish
va izchil rivojlantirishdan iborat. Universitet
ta’lim dasturlari hamda xizmatlar sifatini muntazam baholash va
takomillashtirish orqali o‘quv jarayonining samaradorligini oshirish, uning
ilg‘or xalqaro standartlarga muvofiqligini ta’minlashni o‘zining ustuvor
vazifasi deb biladi.
Universitet talabalarning
akademik muvaffaqiyati, shaxsiy kamoloti va kasbiy rivojlanishini har tomonlama
qo‘llab-quvvatlashga, akademik halollik va ilmiy etika tamoyillariga asoslangan
tadqiqotlarni rivojlantirishga, shuningdek, jamiyat taraqqiyotiga ijobiy va
barqaror hissa qo‘shishga qat’iy sodiqdir.
Farg‘ona davlat universitetining strategiyasi:
Bizning strategiyamiz
– zamonaviy va talabaga yo‘naltirilgan ta’lim, ilg‘or ilmiy tadqiqot va
innovatsiyalar, xalqaro hamkorlik hamda uzluksiz sifat takomili orqali
raqobatbardosh mutaxassislar tayyorlash, jamiyatning barqaror taraqqiyotiga
xizmat qilish va milliy hamda xalqaro ta’lim makonida yetakchi mavqeni
egallashdir.
Strategik
maqsadlarimiz:
– Ta’limda
mukammallikka erishish: akademik dasturlarni zamonaviy ilmiy yutuqlar, ilg‘or
pedagogik yondashuvlar va mehnat bozori talablari asosida muntazam
takomillashtirish, ularning mahalliy, milliy hamda global ehtiyojlarga muvofiqligini
ta’minlash;
– Professor-o‘qituvchilar
va xodimlarning kasbiy salohiyatini rivojlantirish: malaka oshirish
dasturlari, treninglar, seminarlar, konferensiyalar, akademik almashinuvlar va
uzluksiz ta’lim imkoniyatlari orqali professor-o‘qituvchilar hamda ma’muriy
xodimlarning kasbiy kompetensiyalarini izchil rivojlantirish;
– Talabaga
yo‘naltirilgan ta’limni rivojlantirish: talabalarning ta’lim jarayonidagi
faol ishtirokini ta’minlaydigan, ularning mustaqil va tanqidiy fikrlashi,
ijodkorligi, tashabbuskorligi hamda muammolarni samarali hal etish
ko‘nikmalarini rivojlantiradigan inklyuziv va qo‘llab-quvvatlovchi ta’lim
muhitini yaratish;
– Xalqaro hamkorlikni
kengaytirish: ta’lim va ilmiy-tadqiqot faoliyatining xalqaro
integratsiyasini kuchaytirish, xorijiy oliy ta’lim va ilmiy-tadqiqot
muassasalari bilan strategik sherikliklarni rivojlantirish, qo‘shma ta’lim
dasturlari, ilmiy loyihalar, akademik mobillik hamda almashinuv dasturlari
ko‘lamini kengaytirish.