Farg`ona davlat universiteti

“ZAKOVAT”: BILIN VA TAFAKKUR BELLASHUVI

Farg‘ona davlat universitetida talabalar o‘rtasida “Zakovat” intellektual o‘yinining universitet bosqichi bo‘lib o‘tdi. Mazkur tadbir yoshlarning bilimga bo‘lgan qiziqishini oshirish, tafakkur va mantiqiy fikrlash qobiliyatlarini rivojlantirish, shuningdek, jamoaviy hamkorlikda ishlash ko‘nikmalarini mustahkamlash maqsadida tashkil etildi.

Bellashuvda turli fakultetlardan yig‘ilgan bilimdon talabalar jamoalari o‘zaro kuch sinashdi. O‘yin davomida ishtirokchilar tezkor fikrlash, ijodiy yondashuv, mantiqiy tahlil va jamoaviy hamjihatlik asosida savollarga javob topishga harakat qilishdi. Har bir bosqich intellektual muhitda katta qiziqish va hayajon bilan kechdi.

Tadbir yakunida eng faol va bilimli jamoalar g‘olib deb topildi. Ular munosib tarzda faxriy diplomlar, esdalik sovg‘alari va tabriklar bilan taqdirlandilar. Ayniqsa, o‘zaro raqobatda do‘stona muhit saqlab qolinganligi, barcha ishtirokchilarning bilim saviyasi yuqori bo‘lganligi e’tirof etildi.

Tashkilotchilar ta’kidlaganidek, “Zakovat” o‘yini nafaqat bilim sinovi, balki intellektual muloqot, tafakkur va mantiqni charxlaydigan platforma sifatida yoshlar orasida ommalashib borayotgan muhim tashabbusdir. Bu kabi tadbirlar zamonaviy bilimlarni chuqurlashtirish, o‘z ustida ishlash va sog‘lom raqobat muhitini shakllantirishda katta ahamiyatga ega.