Farg`ona davlat universiteti

“BESH TASHABBUS OLIMPIADASI”: “FARDU” JAMOASI RESPUBLIKA BOSQICHIDA!

Sirdaryo viloyatining Guliston shahrida katta shukuh bilan tashkil etilgan “Besh tashabbus olimpiadasi” ommaviy sport musobaqalari o‘zining yorqin final pallasiga yetdi. Mamlakatimizning turli hududlaridan eng kuchli jamoalarni birlashtirgan ushbu nufuzli sport festivali yoshlar o‘rtasida sog‘lom turmush tarzini targ‘ib etish, iste’dodlarni kashf qilish va sportga qiziqishni yanada oshirishni maqsad qilgan.

Shu jarayonda Farg‘ona davlat universiteti jamoasi ham o‘zining salohiyati va jipslashgan jamoaviy o‘yini bilan ajralib turdi. Talabalarimiz besh yo‘nalish bo‘yicha Respublika final bosqichida faol ishtirok etib, bir nechta yo‘nalishlarda yuqori natijalarga erishishdi.

• - Mini-futbol — jamoamiz keskin kurashlarga boy bellashuvlarda o‘z mahoratini namoyon etib, bronza medalini (3-o‘rin) qo‘lga kiritdi.
• - Voleybol (qizlar) — farg‘onalik qizlarimiz kuchli raqiblar bilan bahslarda matonat ko‘rsatib, bronza medalini (3-o‘rin) qo‘lga kiritishga muvaffaq bo‘lishdi.
• -Stol tennisi — tezkorlik va chaqqonlikni talab qiladigan ushbu yo‘nalishda jamoamiz vakillari alohida iqtidor sohibi ekanliklarini yana bir bor isbotlab, kumush medal (2-o‘rin) bilan taqdirlandilar.

Musobaqalarda namoyish etilgan irodali o‘yin, qat’iyat va mas’uliyatli tayyorgarlik tufayli Farg‘ona davlat universiteti jamoasi olimpiadaning eng faol va e’tirof etilgan ishtirokchilaridan biriga aylandi.

Olingan yutuqlar universitetimizda jismoniy tarbiya va sportga qaratilayotgan e’tibor, murabbiylar mehnati hamda yoshlarimizning intilishi samarasidir. Ushbu natijalar kelgusida yangi marralarni zabt etishda mustahkam poydevor bo‘lib xizmat qiladi.