Farg`ona davlat universiteti

“EL-YURT UMIDI” STIPENDIATLARI — “ISTIQBOLLI DAVLAT XIZMATCHISI – 2025” TANLOVI G‘OLIBLARI SAFIDA

Farg‘ona viloyatida ilk bor Boshqaruv samaradorligi agentligi hamda viloyat hokimligi hamkorligida “Istiqbolli davlat xizmatchisi – 2025” tanlovi o‘tkazildi. Ushbu tanlov yosh mutaxassislarning boshqaruv ko‘nikmalarini rivojlantirish, davlat xizmatida samarali faoliyat yurita oladigan malakali kadrlar zaxirasini shakllantirishni maqsad qilgan.

Mazkur nufuzli tanlovda “El-yurt umidi” jamg‘armasi stipendiatlari — Farg‘ona davlat universiteti professor-o‘qituvchilari Saidmuhammad To‘ychiboyzoda, Gulnoza Xamidova va Nilufar Ahmedovalar barcha saralash bosqichlarini muvaffaqiyatli yakunlab, g‘oliblar safidan munosib o‘rin egalladilar.

Tanlov jarayonida ishtirokchilar:

• -davlat boshqaruvi bo‘yicha nazariy bilimlar,
• -muammolarni tahlil qilish va innovatsion yechim taklif qilish ko‘nikmalari,
• -jamoa bilan ishlash va liderlik salohiyati,
• -zamonaviy boshqaruv texnikalaridan foydalanish mahorati kabi mezonlar bo‘yicha baholandi. Farg‘ona davlat universiteti vakillari ushbu yo‘nalishlarning har birida yuqori natijalarni namoyon etib, tanlov komissiyasi tomonidan yuqori baho oldilar.

G‘oliblarning barchasi Farg‘ona viloyatining TOP-100 istiqbolli kadrlar zaxirasiga kiritildi. Bu ularga kelajakda:

• -viloyat va tuman darajasidagi davlat boshqaruvi bo‘linmalarida faoliyat boshlash,
• -tajribali rahbarlar bilan ishlash,
• -malaka oshirish kurslarida ishtirok etish,
• -yirik islohot loyihalarida qatnashish uchun katta imkoniyatlar yaratadi.

Tadbir yakunida g‘oliblarga kasbiy salohiyati va intellektual mehnati e’tirofi sifatida sertifikatlar va ko‘krak nishonlari topshirildi. Ularning tanlovdagi muvaffaqiyati nafaqat shaxsiy yutuq, balki Farg‘ona davlat universiteti ilmiy salohiyatining ham yorqin namunasidir.