Farg`ona davlat universiteti

​ KITOBXONLIK HAFTALIGI: MA’RIFAT VA ILHOM BAYRAMI DAVOM ETMOQDA

Fargʻona davlat universiteti Axborot-resurs markazida oʻtkazilayotgan IV anʼanaviy “Kitobxonlik haftaligi” oʻzining ikkinchi kuni bilan ham ishtirokchilarda unutilmas taassurotlar qoldirdi. Ma’naviyat va ma’rifatga yo‘g‘rilgan mazkur tadbir kitobsevar yoshlarni bir maydonga jamlab, ularni ilm-fan va adabiyot olamiga yanada yaqinlashtirmoqda.

Tadbir davomida oʻzbek adabiyoti va ilm-faniga ulkan hissa qoʻshgan siymolar — akademik Aziz Qayumov, taniqli shoira Saida Zunnunova tavalludining 100 yilligi hamda Oʻzbekiston Qahramoni, xalq shoiri Abdulla Oripov tavalludining 85 yilligi munosabati bilan badiiy chiqishlar tashkil etildi. Talabalar tomonidan ijro etilgan sahna ko‘rinishlari, she’rxonliklar va adabiy kompozitsiyalar yig‘ilganlarga yuqori kayfiyat ulashdi.

Kun davomida amalga oshirilgan faoliyatlar:
- Talabalar o‘rtasida qiziqarli viktorinalar va kitobxonlikka oid intellektual bahs –munozaralar tashkil etildi.
- Faol ishtirok etgan bilimdonlar qimmatbaho va esdalik sovg‘alar bilan taqdirlandi.
- Kitobsevarlar uchun maxsus kitob yarmarkasi yo‘lga qo‘yilib, turli janrdagi adabiyotlar taqdim etildi.

“Kitobxonlik haftaligi” davomida har bir ishtirokchi nafaqat o‘z bilim va tafakkurini sinovdan o‘tkazish, balki yangi do‘stlar orttirish, adabiyot ixlosmandlari bilan fikr almashish imkoniga ega bo‘lmoqda. Eng muhimi, ushbu haftalik yoshlar qalbida kitobga bo‘lgan muhabbatni yanada mustahkamlashga xizmat qilmoqda.

Mazkur loyiha – bu shunchaki tadbir emas, balki yosh avlodni ma’naviy boyitish, ularni kitob bilan do‘st tutinishga undovchi muhim tashabbusdir. Haftalik davom etmoqda va oldinda yana ko‘plab qiziqarli uchrashuvlar, tanlovlar hamda adabiy kechalar ishtirokchilarni kutmoqda.