Farg`ona davlat universiteti

FARDUDA XALQARO ANJUMAN: “SUN’IY INTELLEKT VA IMMERSIV TEXNOLOGIYALAR KELAJAGI”

Farg‘ona davlat universiteti Fizika-matematika fakultetida “Sun’iy intellekt va immersiv texnologiyalar: nazariya, amaliyot, kelajak” mavzusidagi nufuzli xalqaro ilmiy-amaliy anjuman bo‘lib o‘tdi. Mazkur tadbir zamonaviy texnologiyalar rivojini ilmiy nuqtai nazardan tahlil qilish, tajriba almashish hamda istiqbolli loyihalarni shakllantirishga xizmat qildi.

Anjumanda Qozog‘iston, Qirg‘iziston va Slovakiya davlatlarining yetakchi oliy ta’lim muassasalari hamda ilmiy markazlaridan tashrif buyurgan professor-o‘qituvchilar, yosh olimlar va tadqiqotchilar faol ishtirok etdi. Bu esa tadbirga xalqaro miqyosda yuqori ilmiy salohiyat va tajriba olib kirganini ko‘rsatdi.

Anjuman davomida sun’iy intellekt va zamonaviy texnologiyalarning turli jihatlari keng qamrovda muhokama qilindi:

• Sun’iy intellektning nazariy asoslari – algoritmlar, modellar va ularning rivojlanish tendensiyalari;
• Ta’lim, fan va tibbiyotda AI – raqamli transformatsiya, diagnostika va o‘qitish jarayonlarini optimallashtirish;
• Innovatsiyalar va sanoat ilovalari – ishlab chiqarish samaradorligini oshirish va avtomatlashtirish;
• Virtual va kengaytirilgan borliq (VR/AR) – immersiv texnologiyalarning yangi imkoniyatlari;
• Axloqiy va ijtimoiy masalalar – sun’iy intellekt rivojining jamiyatga ta’siri va mas’uliyatli foydalanish.

Tadbir yakunida turli yo‘nalishlar bo‘yicha ishlab chiqilgan innovatsion loyihalar taqdim etildi va chuqur tahlil qilindi. Ishtirokchilar tomonidan ilgari surilgan g‘oyalar asosida:

• o‘quv jarayoniga zamonaviy texnologiyalarni joriy etish,
• ilmiy tadqiqotlarni amaliyot bilan uyg‘unlashtirish,
• yosh olimlarni qo‘llab-quvvatlash

bo‘yicha muhim tavsiyalar ishlab chiqildi.

Mazkur anjuman nafaqat ilmiy muloqot maydoni, balki yangi hamkorliklar, innovatsion g‘oyalar va texnologik yechimlar uchun mustahkam platforma vazifasini o‘tadi.