Farg`ona davlat universiteti

TARIX FAKULTETIDA “KARYERA KUNI ”

Farg‘ona davlat universitetining Tarix fakultetida bitiruvchi talabalar uchun muhim ahamiyatga ega bo‘lgan “Karyera kuni” tadbiri tashkil etildi. “Kelajakka qadam” shiori ostida o‘tkazilgan mazkur uchrashuv yoshlarni mehnat bozoriga tayyorlash, ularning kasbiy yo‘nalishini belgilash va kelajakdagi faoliyatini aniq rejalashtirishga xizmat qildi.

Tadbirning asosiy maqsadi bitiruvchi talabalarni turli sohalardagi ish imkoniyatlari bilan tanishtirish, ularni mutaxassislikka mos bo‘lgan tashkilotlar bilan bog‘lash hamda ish beruvchilar bilan bevosita muloqot o‘rnatishdan iborat bo‘ldi. Ushbu ochiq platforma orqali talabalar nafaqat bo‘sh ish o‘rinlari haqida ma’lumot oldilar, balki zamonaviy mehnat bozorida talab etilayotgan kasbiy ko‘nikmalar bilan ham yaqindan tanishdilar.

Tadbirda O‘zbekiston Respublikasi Prezidenti huzuridagi Ijtimoiy himoya milliy agentligi, Yoshlar ishlari agentligi, Milliy tiklanish demokratik partiyasi, Farg‘ona viloyati davlat arxivi boshqarmasi, Farg‘ona viloyati Maktabgacha va maktab ta’limi boshqarmasi hamda Farg‘ona viloyati Ma’naviyat va ma’rifat markazi vakillari ishtirok etib, o‘z sohalari bo‘yicha talabalar bilan samimiy muloqot olib bordilar.

Uchrashuv davomida mutaxassislar davlat boshqaruvi, ta’lim, arxivshunoslik, ijtimoiy himoya va ma’naviy-ma’rifiy yo‘nalishlarda mavjud ish imkoniyatlari, kasbiy talablar va karyera rivojlanish yo‘llari haqida batafsil ma’lumot berdilar. Ayniqsa, tarix yo‘nalishi bitiruvchilari uchun arxiv, ta’lim, ilmiy tadqiqot va davlat xizmatidagi istiqbolli yo‘nalishlar alohida e’tibor markazida bo‘ldi.

Talabalar o‘zlarini qiziqtirgan savollarni bevosita tashkilot vakillariga yo‘llab, ishga joylashish tartibi, amaliyot o‘tash imkoniyatlari, malaka oshirish dasturlari va kasbiy o‘sish bo‘yicha kerakli tavsiyalarni oldilar. Bu esa tadbirning amaliy ahamiyatini yanada oshirdi.

Mazkur “Karyera kuni” Farg‘ona davlat universitetida talabalarni kelajak kasbiy hayotga tayyorlash, ularning bandligini ta’minlash va ta’lim bilan amaliyot o‘rtasidagi uzviy bog‘liqlikni mustahkamlash yo‘lidagi muhim tashabbuslardan biri sifatida katta taassurot qoldirdi.