O‘zbekiston tumani hokimi Ravshanbek Begmatov tuman hududidagi oliy va professional ta’lim muassasalarining istiqbolli bitiruvchilari bilan samimiy va ochiq muloqot o‘tkazdi.
Mazkur muhim uchrashuvda tuman hokimining o‘rinbosarlari, tijorat banklarining mas’ul vakillari, tizimga oid daxldor muassasalarning mutasaddilari, yoshlar yetakchilari hamda Farg‘ona davlat universiteti (FarDU)ning faol bitiruvchilari ishtirok etdilar.
Tadbirni kirish so‘zi bilan ochgan tuman hokimi Ravshanbek Begmatov O‘zbekiston Respublikasi Prezidenti tomonidan olib borilayotgan davlat siyosatining ustuvor yo‘nalishlaridan biri yoshlarning kelajagini ta’minlash ekanligini alohida ta’kidladi.
Hokim yoshlarning bilim va salohiyatini ro‘yobga chiqarish, ularni munosib ish o‘rinlari bilan ta’minlash hamda tadbirkorlik tashabbuslarini qo‘llab-quvvatlash masalalari doimiy e’tiborda ekanligini qayd etdi.
Uchrashuv davomida tijorat banklari vakillari bitiruvchi yoshlarga moliyaviy ko‘maklashish maqsadida ishlab chiqilgan “Kelajakka qadam” va “Biznesga birinchi qadam” kabi dasturlarning afzalliklari va imtiyozlari haqida batafsil ma’lumot berdilar.
Yoshlarga tadbirkorlik faoliyatini boshlash uchun kredit olish tartibi, imtiyozli shartlar va biznes loyihalarini amalga oshirishda ko‘rsatiladigan amaliy yordam tushuntirildi.
Ochiq muloqot formatida kechgan uchrashuv davomida bitiruvchilar o‘zlarini qiziqtirgan savollar bilan murojaat qilish imkoniyatiga ega bo‘ldilar. Yoshlarni ishga joylashish, tadbirkorlikni yo‘lga qo‘yish, zamonaviy kasblarni o‘rganish kabi masalalar ko‘proq qiziqtirdi. Hokim va mutasaddi rahbarlar har bir savolga atroflicha javob berib, yoshlarning kelajakdagi rejalari va intilishlarini qo‘llab-quvvatlashga tayyor ekanliklarini bildirdilar.
Ushbu muloqot bitiruvchi yoshlarning muammolarini bevosita eshitish, ularning takliflarini inobatga olish hamda kelgusidagi faoliyatlari uchun zarur ko‘makni ko‘rsatishga qaratilgan muhim qadam bo‘ldi.Barcha huquqlar himoyalangan. © 2025
Iltimos, kuting. Yuklanyapti...
