Farg`ona davlat universiteti

TANQIDIY TAHLIL

Universitetda fakultetlar faoliyatini kompleks o'rganish davom etmoqda.

Jumladan, universitet rektorining 2025-yil 7-fevraldagi 43-sonli buyrug'iga muvofiq, oliy ta'lim muassasasida ta'lim-tarbiya jarayonining sifatini oshirish maqsadida fakultetlar faoliyatini kompleks o'rganish ishlari jadal sur'atlarda olib borilmoqda. Ushbu muhim jarayonning navbatdagi manzili Fizika-matematika fakulteti bo'ldi.

Kecha fakultetda rektor boshchiligida kengaytirilgan tanqidiy yig'ilish bo'lib o'tdi. Yig'ilishda fakultetda olib borilayotgan o'quv-uslubiy, ilmiy va tashkiliy ishlar atroflicha muhokama qilindi.

Kun tartibidan quyidagi dolzarb masalalar o'rin oldi:

O'quv jarayonining tashkillanishi: Dars jadvalining samaradorligi, auditoriyalardan foydalanish tartibi va o'quv yuklamalarining taqsimoti kabi masalalar tanqidiy ko'zdan kechirildi.

Talabalar davomatini nazorat qilish: Talabalarning darslarga qatnashish darajasi, davomatni elektron tizim orqali nazorat qilish mexanizmlari va sababsiz qoldirish holatlarining oldini olish bo'yicha takliflar o'rtaga tashlandi.

Ilmiy salohiyat: Fakultet professor-o'qituvchilarining ilmiy-tadqiqot faoliyati, chop etilgan ilmiy maqolalar, grant loyihalarida ishtiroki va yosh tadqiqotchilarni qo'llab-quvvatlash masalalari muhokama qilindi.

Hemis dasturiga doir muammolar: O'quv jarayonini avtomatlashtirishda muhim ahamiyatga ega bo'lgan Hemis axborot tizimidan foydalanishdagi mavjud texnik va metodik muammolar tahlil qilindi va ularni bartaraf etish yo'llari belgilab olindi.

Amaliy va seminar dars mashg'ulotlarini sifatli tashkil etish: Nazariy bilim bilan amaliy ko'nikmalarning uyg'unligini ta'minlash maqsadida amaliy va seminar mashg'ulotlarining mazmuni, o'tkazilish metodikasi va samaradorligini oshirish bo'yicha fikrlar almashildi.

Kafedralar o'quv-uslubiy faoliyati: Fakultet kafedralarining o'quv rejalari, fan dasturlari, ma'ruza matnlari va boshqa o'quv-uslubiy materiallar bilan ta'minlanganlik darajasi ko'rib chiqildi.

Professor-o'qituvchilar tomonidan o'quv adabiyotlarning yaratilishi: Talabalarni sifatli o'quv adabiyotlari bilan ta'minlash maqsadida professor-o'qituvchilarning yangi darsliklar va o'quv qo'llanmalarini yaratish bo'yicha faoliyati tahlil qilindi va rag'batlantirish choralari muhokama etildi.

Yig'ilish davomida aniqlangan kamchiliklarni bartaraf etish va fakultet faoliyatini yanada takomillashtirish bo'yicha aniq vazifalar belgilab olindi va ularning ijrosi nazoratga olindi.

Universitet rahbariyati fakultetlarda ta'lim-tarbiya jarayonini kompleks o'rganish orqali mavjud muammolarni aniqlash va ularni hal etish, pirovardida esa ta'lim sifatini oshirishga qaratilgan ishlarni davom ettiradi.