Farg`ona davlat universiteti

AXBOROT XIZMATLARI FAOLIYATIDA YANGI DAVR!

Axborot xizmati endilikda shunchaki matbuot bayonotlari bilan cheklanmaydi. U — raqamli dunyoda brend yaratish, auditoriya ishonchini qozonish va jamiyat bilan jonli aloqa o‘rnatish san’atiga aylangan. Bu boradagi yondashuvlar esa tobora takomillashib, zamonaviy texnologiyalar va sun’iy intellekt imkoniyatlari bilan boyitilmoqda.

2025-yil 3-5-iyul kunlari Oliy ta’lim, fan va innovatsiyalar vazirligi tomonidan tashkil etilgan "Axborot xizmati faoliyatida zamonaviy tendensiyalar" mavzusidagi malaka oshirish kursi aynan shunday o‘zgarishlarning amaliy ifodasiga aylandi.

Mazkur kursda 100 dan ortiq oliy ta’lim muassasalari axborot xizmati xodimlari ishtirok etdi. Dastur doirasida ular media sohasidagi ilg‘or tajribalar, PR strategiyalari, raqamli kommunikatsiya vositalari, kontent yaratish metodikasi hamda sun’iy intellektdan samarali foydalanish bo‘yicha chuqur bilimlarga ega bo‘ldilar.

Farg‘ona davlat universiteti sayt muxbiri Gafurova Nafosat Jaloldinovna ham mazkur kursda faol ishtirok etdi. Uning qatnashuvi universitet axborot xizmatining yanada samarali faoliyat yuritishiga zamin yaratishi, kommunikatsiya strategiyasida yangicha yondashuvlarni joriy etishiga xizmat qilishi shubhasiz.

Bu kurs — nafaqat bilim va ko‘nikmalarni oshirish, balki axborot xizmatlarining kelajakdagi yo‘nalishini belgilab beradigan transformatsion tajriba bo‘ldi. Ishtirokchilar malaka oshirish bilan birga kasbiy hamjamiyat doirasini kengaytirib, yangi tarmoqlar va professional aloqalar o‘rnatish imkoniyatiga ega bo‘ldilar.

Tadbir yakunida Oliy ta’lim, fan va innovatsiyalar vaziri – Kongratbay Sharipov tomonidan barcha ishtirokchilarga malaka oshirish bo‘yicha sertifikatlar topshirildi.

Endi ular ish faoliyatiga yangicha qarash, ilg‘or vosita va yondashuvlar bilan yondashadilar. Yangi bilim – yangi yondashuv, yangi natijalar demakdir.