Farg`ona davlat universiteti

INTELLEKTUAL MULKNI TIJORATLASHTIRISH: ILMIY G’OYALARDAN – AMALIY NATIJALARGACHA

Farg‘ona Davlat Universitetida muhim bir ilmiy-amaliy seminar bo‘lib o‘tdi. Tadbirda “Intellektual mulk markazi” davlat muassasasi Ixtiro va foydali modellar bo‘limi boshlig‘i I.Abduqodirov ishtirok etdi hamda universitet professor-o‘qituvchilari, ilmiy izlanuvchilar va tadqiqotchilar uchun intellektual mulk obyektlarini tijoratlashtirishga oid dolzarb masalalar yuzasidan batafsil ma’lumotlar berdi.

Tadbirning asosiy maqsadi — ilmiy tadqiqot natijalarini nafaqat nazariy bilim sifatida saqlab qolish, balki ularni real iqtisodiy qiymatga ega mahsulotga aylantirish, ya’ni tijoratlashtirish jarayoniga yo‘naltirishdan iborat bo‘ldi.

Seminar davomida quyidagi muhim mavzular muhokama qilindi:

Intellektual mulk obyektlarini qanday huquqiy muhofaza qilish mumkin?

Tijoratlashtirishga tayyor g‘oyalar qanday aniqlanadi?

Ixtiro va foydali modellarni ro‘yxatdan o‘tkazish bosqichlari.

Patent ma’lumotlarini investorlarga taqdim etish mexanizmlari.

“Intellektual mulk markazi”ning yangi onlayn platformasi orqali ko‘maklashish imkoniyatlari.

I.Abduqodirov o‘z chiqishida, ayniqsa, Intellektual mulk markazi rasmiy veb-saytida yangi ishga tushirilgan maxsus havola haqida alohida to‘xtalib o‘tdi. Ushbu havola orqali potensial investorlar, ishlab chiqaruvchilar va tadbirkorlar intellektual mulk obyektlari haqida aniq, ishonchli va rasmiy patent ma’lumotlariga ega bo‘lishlari mumkinligi ta’kidlandi.

Seminar ishtirokchilari uchun bu tadbir, shubhasiz, ilmiy ishlarini keng ommaga taqdim etish, ularni amaliyotda qo‘llash va iqtisodiy jihatdan foydali mahsulotga aylantirish sari muhim qadam bo‘ldi. Tadbir yakunida ko‘plab professor-o‘qituvchilar va izlanuvchilar o‘z savollari bilan chiqish qilib, mavjud ilmiy ishlanmalarini tijoratlashtirishga oid individual maslahatlar olishdi.

Intellektual mulk — bu faqat g‘oya emas, balki kelajakdagi mahsulot, xizmat yoki texnologiyaning asosi. Bugungi seminar ilm-fan va ishlab chiqarish o‘rtasidagi ko‘prikni mustahkamlash, innovatsiyalarni iqtisodiy ob’yektga aylantirish yo‘lida navbatdagi muhim qadamlardan biri bo‘ldi.