O‘zbekiston Pro-ligasining navbatdagi bosqichiga jiddiy tayyorgarlik ko‘rayotgan “FarDU” futbol jamoasi nazorat uchrashuvlari orqali o‘z holatini sinovdan o‘tkazishda davom etmoqda.
Oltiariq tumanidagi “Imkon-arena” stadionida “FarDU” jamoamiz Farg‘onaning “Neftchi” (U-21) jamoasiga qarshi maydonga tushdi va tomoshabop, gollarga boy o‘yinda 3:2 hisobida irodali g‘alabani qo‘lga kiritdi.
Sergey Lebedev boshchiligidagi jamoamiz o‘yinni faol va hujumkor boshlab, birinchi bo‘limdayoq ustunlikni qo‘lga oldi. “FarDU” safida quyidagi futbolchilar o‘z nomlarini tabloga yozib qo‘ydilar:
Abdulloh Olimov – tezkor hujum va aniq zarba bilan hisobni ochdi;
Abrorjon Inomov – to‘pni raqib himoyasidan o‘tkazib, ustunlikni mustahkamladi;
Murodxo‘ja Jabborov – yakuniy gol bilan jamoamiz g‘alabasini ta’minladi.
Raqib jamoa ham faol harakat qildi, biroq uchrashuv taqdirini jamoamizning bardavom pressingi va aniqligi hal qildi.
Bu nazorat o‘yini nafaqat jismoniy tayyorgarlik, balki jamoaviy uyg‘unlik, taktik yondashuv haqida muhim xulosa chiqarish imkonini berdi.
Sergey Lebedev bosh murabbiyligidagi “FarDU” jamoasi Pro-liga bahslariga tayyorgarlik doirasida o‘ziga bo‘lgan ishonchni mustahkamlab bormoqda.
Yaqinlashib kelayotgan Pro-liga bahslarida jamoamizdan yuqori natijalar kutib qolamiz. “FarDU” futbolchilari ushbu nazorat uchrashuvi orqali o‘zlarining jismoniy va ruhiy holatda tayyor ekanliklarini isbotladilar.
Barcha huquqlar himoyalangan. © 2025
Iltimos, kuting. Yuklanyapti...
