Farg`ona davlat universiteti

“DOLZARB 90 KUN”: YOSHLAR MA’NAVIYATI VA SALOMATLIGI YO’LIDA BIRLASHTIRUVCHI TASHABBUS

Yozgi ta’til davrida yoshlarning bo‘sh vaqtini mazmunli tashkil etish, ularni sog‘lom turmush tarzi, ilm-fan va ma’naviy qadriyatlarga yo‘naltirish bugungi kunning eng muhim vazifalaridandir. Farg‘ona viloyatida aynan shu maqsadni ko‘zlagan “Dolzarb 90 kun” loyihasi doirasida keng qamrovli va jozibador tadbirlar amalga oshirilmoqda. Ushbu loyihada oliy ta’lim muassasalari, mahallalar, maktablar va xususiy korxonalar bilan hamkorlikda o‘tkazilayotgan turli mashg‘ulotlar yosh avlodning har tomonlama rivojlanishiga xizmat qilmoqda.

Xususan, Farg’ona davlat universitetining Sport faoliyati fakulteti tashabbusi bilan Beruniy, Muruvvat, Qirg‘uli, Hamkorlik, Kimyogar va Tabassum mahalla fuqarolar yig‘inlarida istiqomat qilayotgan yoshlar uchun Taekvondo sport turidan muntazam to‘garak mashg‘ulotlari yo‘lga qo‘yildi. Bu bilan yoshlarning jismoniy chiniqishi, intizomli hayot tarziga o‘rganishi va sportga bo‘lgan qiziqishining ortishiga keng imkoniyat yaratildi.

Jismoniy madaniyat fakulteti talabalari esa Quvasoy shahridagi 5-umumiy o‘rta ta’lim maktabida “Dolzarb 90 kun” loyihasi doirasida o‘quvchilar bilan kitobxonlik, shashka va boshqa intellektual mashg‘ulotlar o‘tkazib kelmoqda. Bu kabi tadbirlar maktab o‘quvchilarining tafakkurini o‘stirish, bo‘sh vaqtini samarali o‘tkazish va ijtimoiy faolligini kuchaytirishga xizmat qilmoqda.

Shuningdek, Tarix fakulteti professor-o‘qituvchilari tomonidan Farg‘ona shahridagi Ilg‘or MFY hududida joylashgan 44-maktab yozgi oromgohida tashkil etilgan uchrashuv esa yoshlarning tarixiy ongini yuksaltirishga qaratildi. Uchrashuvda yurtimizda amalga oshirilayotgan islohotlar, oliy ta’lim tizimidagi yangiliklar, davlat ramzlari va qadriyatlar haqida davra suhbati hamda “Tariximizdagi buyuk siymolar” mavzusida qiziqarli o‘yin tashkil etildi. Bu orqali yoshlar o‘z tarixini anglash, vatanni sevish va e’zozlash g‘oyalari bilan sug‘orildi.

Pedagogika-psixologiya va san’atshunoslik fakulteti musiqiy ta’lim va madaniyat kafedrasi professor-o‘qituvchilari hamda talabalari tomonidan tashkil etilgan “FORESTCOLOR” kiyim ishlab chiqarish korxonasiga tashrif esa yoshlar uchun amaliy bilim, zamonaviy ishlab chiqarish jarayonlari bilan tanishuv va kasbga yo‘naltirish imkoniyatini yaratdi. Tashrif davomida talabalarda mehnat madaniyati, ijodkorlik va tashabbuskorlik ko‘nikmalari mustahkamlandi.

“Dolzarb 90 kun” loyihasi – yoshlarning faolligini oshirish, ularning ijtimoiy, madaniy, jismoniy va intellektual rivojiga kuchli turtki beruvchi muhim tashabbus sifatida namoyon bo‘lmoqda. Bu kabi sa’y-harakatlar yosh avlodni bilimli, sog‘lom, ma’naviy yetuk shaxs sifatida tarbiyalashda muhim o‘rin tutadi