Farg`ona davlat universiteti

“DOLZARB 90 KUN” DOIRASIDA YOSHLAR FAOLLIGI

Farg‘ona davlat universiteti tomonidan amalga oshirilayotgan “Dolzarb 90 kun” loyihasi doirasida talabalar nafaqat o‘z bilim va ko‘nikmalarini mustahkamlab borishmoqda, balki jamiyat hayotiga bevosita hissa qo‘shishmoqda. Viloyat hokimining 2025-yil 4-iyundagi 02-07/1189-sonli topshiriq xatiga asosan, yozgi ta’til vaqtida talabalar ishtirokida amalga oshirilayotgan ijtimoiy foydali loyihalar turli yo‘nalishlarda faol tarzda davom etmoqda.

Jismoniy madaniyat fakulteti talabalari tomonidan Farg‘ona shahar 36-umumta’lim maktabida sportning taekvondo turi bo‘yicha tashkil etilgan to‘garak mashg‘ulotlari muntazam ravishda o‘tkazilmoqda. Bu tashabbus nafaqat o‘quvchilarning jismoniy sog‘lomligini mustahkamlash, balki ularning irodaviy sifatlarini shakllantirish, sportga bo‘lgan qiziqishini oshirishga xizmat qilmoqda. To‘garak mashg‘ulotlari malakali talabalar tomonidan olib borilib, ular o‘z nazariy bilimlarini amaliyotga tadbiq etmoqda.

Shu bilan birga, “Xorijiy tillarni o‘qitish” loyihasi doirasida Ingliz tili va adabiyoti fakulteti talabalari tomonidan Farg‘ona viloyatining turli hududlarida ingliz tili to‘garaklari faoliyati yo‘lga qo‘yildi. Jumladan:

• -Farg‘ona tumani 61-maktab,
• -Quva tumani 26-maktab,
• -Qo‘shtepa tumani 46-maktabda talabalar maktab o‘quvchilariga ingliz tili fanidan dars mashg‘ulotlarini tashkil etishmoqda.

Ushbu loyihalar o‘quvchilarda xorijiy tilga qiziqishni kuchaytirish, ularning lug‘at boyligini oshirish, suhbatlashish ko‘nikmalarini rivojlantirishga qaratilgan. Talabalar esa pedagogik amaliyotlarini hayotiy tajriba orqali mustahkamlab borishmoqda.

Pedagogika-psixologiya va san’atshunoslik fakultetining maktabgacha ta’lim kafedrasi o‘qituvchi va talabalari esa yozgi ta’til davrida o‘z mehnat faoliyatlarini “Teamdress” MChJ tarkibidagi maktabgacha ta’lim muassasasida davom ettirishmoqda. Bu yerda ular bolalar bilan bevosita ishlash orqali o‘zlarining nazariy bilim, malaka va ko‘nikmalarini amaliyotga tatbiq etib, maktabgacha yoshdagi bolalar bilan ishlash bo‘yicha qimmatli tajriba orttirmoqdalar.

Farg‘ona davlat universiteti tomonidan amalga oshirilayotgan ushbu ko‘lamli va yo‘naltirilgan loyihalar — bu talabalarning faolligi, ijtimoiy mas’uliyat hissining yuqoriligi va ta’limda amaliy yondashuvning yuksak namunasi hisoblanadi. “Dolzarb 90 kun” dasturi doirasida yoshlar o‘z ta’lim sohasida chuqur bilim olish bilan birga, jamiyat rivoji uchun foydali bo‘lgan real loyihalarda ishtirok etishmoqda.