Farg`ona davlat universiteti

FARG’ONA DAVLAT UNIVERSITETI TALABALARI XITOYNING LUOYANG SHAHRIDA AMALIYOTDA

Fargʻona davlat universitetining "Oʻzbekiston-Xitoy hamkorligidagi arxeologiya kafedrasi" talabalari Xitoyning qadimiy shahri Luoyangda joylashgan Arxeologiya institutida ilmiy-amaliy mashgʻulotlarda ishtirok etmoqda.

Talabalar ushbu safar davomida Jengpingfang Tang davri arxeologik yodgorligi hududida olib borilayotgan restavratsiya ishlari bilan bevosita tanishib, miloddan avvalgi II asrga oid Han davlati davridagi topilmalarni restavratsiya qilish bo‘yicha amaliy bilim va ko‘nikmalarga ega bo‘lishmoqda. Qayd etish joizki, bu davr Fargʻona vodiysidagi Davon davlati bilan tarixan bir davrga toʻgʻri keladi.

Restavratsiya darslari Luoyang arxeologiya instituti yetakchi mutaxassislari — Zhang Zhengqian va Li Gangzheng tomonidan olib borilmoqda. Ular o‘z tajribalari bilan o‘rtoqlashar ekan, nafaqat texnik bilimlar, balki arxeologik yondashuv va madaniy muloqot bo‘yicha ham qimmatli maslahatlar bermoqda.

Bu ilmiy safar nafaqat Oʻzbekiston va Xitoy oʻrtasidagi madaniy aloqalarning mustahkamlanishiga xizmat qilmoqda, balki yosh avlod arxeologlarining xalqaro tajriba almashinuvini kengaytirishda muhim ahamiyat kasb etmoqda.