Farg‘ona davlat universitetida yoshlarga oid davlat siyosatini amaliyotda namoyon etuvchi navbatdagi ijobiy tashabbus — “Dolzarb 90 kun” loyihasi doirasida yana bir muhim yo‘nalishda amalga oshirilmoqda.
Ma’lumki, universitetda "Bunyodkor yoshlar" nomli qurilish otryadi tashkil etilgan bo’lib, mazkur otryadning asosiy maqsadi — yoshlarning yozgi ta’til davrini samarali tashkil etish, ularni mehnatsevarlik, tashabbuskorlik va jamoaviylik ruhida tarbiyalashdir.
Ayni paytda ushbu otryad tarkibidagi 20 nafar faol va fidokor talabalar yozgi ta’tilni foydali o‘tkazish barobarida, universitet infratuzilmasini yanada zamonaviylashtirish yo‘lida o‘z hissalarini qo‘shmoqdalar.
Otryad ishtirokchilari quyidagi hududlarda faoliyat yuritmoqda:
Talabalar turar joylarida — xona va yotoqxonalarning kosmetik ta’miri, bo‘yoq ishlari, sanitariya holatlarini yaxshilash;
O‘quv binolarida — sinfxonalar, yo‘laklar va kirish qismlarini yangilash ishlari;
Sport majmuasi — zamonaviy sport maydonchalarini ta’mirlash va obodonlashtirish ishlari;
Ular nafaqat jismonan mehnat qilmoqdalar, balki har bir bo‘yoq, har bir g‘isht, har bir ta’mir iziga o‘z mehr-muhabbatlarini ham qo‘shmoqdalar. Bu esa universitet muhitini yanada jozibador, qulay va talabalarga mos holatga keltirishda muhim ahamiyat kasb etmoqda.
"Bunyodkor yoshlar" otryadi – bu shunchaki ta’mirlash guruhi emas. Bu — fidokor yoshlarning kelajakka bo‘lgan e’tibori, o‘z universitetiga bo‘lgan mehrining amaliy ifodasi, yosh avlodning ijtimoiy faollikda o‘z o‘rnini topayotganining yaqqol isbotidir.