Farg`ona davlat universiteti

XALQARO INTEGRATSIYA

O‘zbekiston oliy ta’lim muassasalari xalqaro maydonda faol ishtirok etayotgan, raqobatbardosh ta’lim tizimiga ega bo‘lgan nufuzli markazlarga aylanmoqda. Bu borada Farg‘ona davlat universiteti ham o‘zining barqaror taraqqiyot strategiyasi asosida katta qadamlar tashlamoqda.

Xususan, xalqaro hamkorliklar doirasida Ingliz tili va adabiyoti fakulteti professor-o‘qituvchilari qo‘shni Qirg‘iziston Respublikasida — Batkent davlat pedagogika universiteti ga tashrif buyurdilar. Maskur tashrifdan ko’zlangan asosiy maqsad: xorijiy abituriyentlar uchun Farg‘ona davlat universitetining eshiklarini keng ochish, ta’lim imkoniyatlari, yo‘nalishlar va xalqaro dasturlar haqida atroflicha ma’lumot berishdir.

Batkentda olib borilayotgan targ‘ibot ishlari yuqori darajada tashkil etilgan. Universitet vakillari xorijiy abituriyentlarga:

• -Farg‘ona davlat universitetining boy ilmiy salohiyati;
• -Xalqaro akkreditatsiyadan o‘tgan o‘quv dasturlari;
• -Ingliz tilida olib boriladigan zamonaviy yo‘nalishlar;
• -O‘zbekistonda ta’lim olishning afzalliklari;
• -Madaniyatlararo muhit va talabalarga yaratilgan imkoniyatlar haqida batafsil ma’lumotlar taqdim etishmoqda.

Mazkur tashrif davomida ikki tomonlama hamkorlik aloqalari mustahkamlanib, kelajakdagi qo‘shma loyihalar, professor-o‘qituvchilar almashinuvi hamda yoshlar o‘rtasida akademik mobilitetni yo‘lga qo‘yish bo‘yicha ham muzokaralar olib borilmoqda.

Bu nafaqat xorijiy abituriyentlarni universitetga jalb etish, balki O‘zbekiston oliy ta’limining xalqaro maydondagi nufuzini oshirishga xizmat qilmoqda. Farg‘ona davlat universitetining xalqaro aloqalardagi bunday faol pozitsiyasi uni Markaziy Osiyodagi ilg‘or ta’lim markazlaridan biriga aylantirmoqda.