Farg`ona davlat universiteti

“DOLZARB 90 KUN” DOIRASIDA YOSHLAR TASHABBUSI – TA’LIM VA AMALIYOT UYG’UNLGI

Yoshlarning bo‘sh vaqtlarini mazmunli tashkil etish, ta’lim jarayonida o‘rgangan nazariy bilimlarni amaliyotga tatbiq etish hamda jamiyatda ijtimoiy faollikni oshirish maqsadida Farg‘ona davlat universitetida bir qator tashabbuslar hayotga tatbiq etilmoqda.

Jumladan, “Dolzarb 90 kunlik” dasturi doirasida va viloyat hokimining 2025-yil 4-iyundagi 02-07/1189-sonli topshiriq xati ijrosini ta’minlash maqsadida Ingliz tili va adabiyoti fakulteti talabalari tomonidan Marg‘ilon shahar 1-maktabida “Easy English” nomli ingliz tili to‘garagi yo‘lga qo‘yildi.

Mazkur to‘garak orqali maktab o‘quvchilari bilan zamonaviy usullarda ingliz tilini o‘rganishga qaratilgan mashg‘ulotlar olib borilmoqda. Talabalar darslarni interaktiv, o‘yinli va kommunikativ metodlarga asoslangan tarzda tashkil etib, kichik yoshdagi o‘quvchilarning chet tiliga bo‘lgan qiziqishini oshirishga xizmat qilmoqda.

Shuningdek, Pedagogika–psixologiya va san’atshunoslik fakultetining Maktabgacha ta’lim kafedrasi talabalari tomonidan ham amaliyot faoliyatlari keng qamrovda olib borilmoqda. Talabalar Farg‘ona shahridagi “Teamdress” MChJga qarashli Maktabgacha ta’lim tashkilotida o‘z nazariy bilimlarini amalda sinab ko‘rishmoqda.

Ular bolalarning rivojlanish bosqichlarini kuzatish, dars mashg‘ulotlarini olib borish, o‘yinlar tashkil etish, pedagogik yondashuvlar va metodik vositalarni to‘g‘ri qo‘llash borasida faol ishtirok etmoqdalar. Bu esa ularga kelgusidagi kasbiy faoliyatlari uchun muhim tayyorgarlik vazifasini o‘taydi.