Farg`ona davlat universiteti

FarDU FUTBOLCHILARI ISHTIROKIDA SEMINAR

Xalqaro futbol qoidalariga kiritilgan o‘zgarishlar yuzasidan seminar bo‘lib o‘tdi

Xalqaro Futbol Assotsiatsiyalari Kengashi (IFAB) tomonidan futbol o‘yini qoidalariga qator muhim o‘zgartirishlar kiritildi. Bu o‘zgarishlar butun dunyo futbol jamoalari uchun dolzarb ahamiyat kasb etadi. Shu munosabat bilan FarDU futbol klubi a’zolari uchun ham maxsus seminar tashkil etildi.

Mazkur tadbirda O‘zbekiston Futbol Hakamlari Markazi (O‘zFHM) nazoratchisi Anvar O‘rinov hamda tajribali hakam Shohrux Azamov ishtirok etib, futbolchilarga yangi qoidalar yuzasidan batafsil tushuntirishlar berdilar. Seminar davomida qoidalarga kiritilgan yangiliklar, ularning amaliy qo‘llanilishi, hakamlik mezonlari va o‘yin jarayoniga ta’siri kabi jihatlar muhokama qilindi.

Seminarning asosiy maqsadi – futbolchilarni eng so‘nggi reglamentlar bilan tanishtirish, professional saviyani oshirish hamda kelgusidagi musobaqalarda xatolarning oldini olishdan iborat bo‘ldi.

Tadbir interaktiv ruhda o‘tkazilib, ishtirokchilar o‘zlarini qiziqtirgan savollar bilan mutaxassislarga murojaat qilishdi va qiziqarli misollar orqali o‘z bilimlarini mustahkamlashdi.

FarDU futbol klubi rahbariyati bunday tadbirlar sportchilarimizni xalqaro talablarga tayyorlashda muhim o‘rin tutishini ta’kidlab, kelgusida ham bu kabi seminarlarni davom ettirish rejalashtirilganini ma’lum qildi.