Farg`ona davlat universiteti

FARG’ONA – LUOYANG ARXEOLOGIK HAMKORLIGI

Farg’ona davlat universitetning Tarix fakulteti “O‘zbekiston–Xitoy hamkorlikdagi arxeologiya” kafedrasi talabalari Xitoyning Luoyang shahrida arxeologik amaliyotda faol ishtirok etmoqda. Ushbu amaliyot ikki davlat o‘rtasidagi ilmiy hamkorlikni mustahkamlash va yosh arxeologlar malakasini oshirishga xizmat qilmoqda.

Talabalar Luoyang arxeologik tadqiqotlar instituti bilan hamkorlikda tashkil etilgan Ikkinchi “Farg‘ona–Luoyang dala arxeologiyasida tadqiqot metodikasidan foydalanish” o‘quv-amaliy kursi doirasida nazariy va amaliy mashg‘ulotlarda qatnashmoqda. Ushbu xalqaro dastur yosh tadqiqotchilarning arxeologik jarayonlar bo‘yicha zamonaviy yondashuvlarni chuqur o‘rganishiga imkon yaratmoqda.

Kafedraning 8 nafar iqtidorli talabalari ayni paytda “Topilmalarni restavratsiya qilish va ko‘rgazmaga tayyorlash” bo‘yicha maxsus darslarda faol ishtirok etishmoqda. Mazkur darslar davomida ular qadimiy artefaktlarni ehtiyotkorlik bilan tozalash, saqlash, ularni ilmiy asosda tiklash va ekspozitsiyalarga tayyorlash bo‘yicha amaliy ko‘nikmalarni o‘zlashtirishmoqda.

Qiziqarli jihati shundaki, restavratsiya qilinayotgan topilmalar Han davlati davriga mansub bo‘lib, ular Davan davlati mavjud bo‘lgan tarixiy davr bilan aynan mos keladi. Bu esa ikki qadimiy sivilizatsiya o‘rtasidagi tarixiy aloqalarni o‘rganishda muhim ilmiy ahamiyat kasb etadi.

Ushbu xalqaro tajriba nafaqat talabalar bilimini oshirmoqda, balki O‘zbekiston va Xitoy o‘rtasidagi arxeologik hamkorlikning yangi bosqichini boshlab bermoqda. Ilmiy aloqalar, madaniy almashinuvlar va o‘zaro tajriba almashuvi orqali ikki xalqning boy tarixiy merosi chuqurroq o‘rganilmoqda.