Farg`ona davlat universiteti

TALABALAR UCHUN YARATILGAN SHAROITLAR O’RGANILMOQDA

O‘zbekiston Respublikasi Oliy Majlisi Qonunchilik palatasi “Adolat” Sotsial-demokratik partiyasi fraksiyasi rahbari Robaxon Mahmudova Farg‘ona viloyatiga tashrif buyurdi.

Tashrif doirasida fraksiya rahbari Farg‘ona davlat universiteti talabalar turar joyi faoliyati va u yerda yaratilgan sharoitlar bilan yaqindan tanishdi. Talabalar uchun qulay yashash, samarali o‘qish va mazmunli dam olish imkoniyatlari, xonalar holati, tozalik va xavfsizlik masalalari, shuningdek zamonaviy infratuzilma mavjudligi o‘rganildi.

Mazkur turar joy talabalarga nafaqat qulay yashash sharoitlarini, balki ularning intellektual va ma’naviy rivojlanishi uchun ham keng imkoniyatlarni taqdim etmoqda. Binoda axborot-resurs markazi, sport va sog‘lomlashtirish zallari, teatr studiyasi, oshxona hamda kir yuvish xonalari kabi qulayliklar talabalar ixtiyorida.

Partiya vakili talabalarga yaratilayotgan bunday sharoitlarni yuqori baholadi. Unga ko‘ra, yoshlarga ko‘rsatilayotgan e’tibor ularning ilmga chanqoqligini oshirish, jamiyatda faol bo‘lishi va salohiyatini to‘liq namoyon etishida muhim ahamiyat kasb etadi.

“Yoshlarimiz uchun yaratilgan har bir imkoniyat – bu mamlakatimiz taraqqiyotiga qo‘shilgan ulkan hissa. Talabalar o‘z bilim va iste’dodlarini rivojlantirib, ertangi kunning malakali kadrlariga aylanishlari uchun barcha shart-sharoitlar yaratib berilishi – davlat siyosatining ustuvor yo‘nalishidir,” – deya ta’kidladi fraksiya rahbari.