Farg`ona davlat universiteti

OLIYGOHDA USTOZ-SHOGIRD TIZIMI SAMARADORLIGINI OSHIRISH

Farg‘ona davlat universitetida “Ustoz-shogird tizimi asosida talababay ishlarni takomillashtirish chora-tadbirlari” mavzusida muhim o‘quv-seminar bo‘lib o‘tdi. Tadbirda universitetning professor-o‘qituvchilari, fakultet dekanlari va kafedra mudirlari ishtirok etib, zamonaviy ta’lim jarayonida ustoz-shogird an’anasining ahamiyati keng muhokama qilindi.

Seminarda ta’kidlanganidek, ustoz va shogird o‘rtasidagi yaqin hamkorlik yoshlarning:

• -ilmiy izlanishlarga qiziqishini oshirish;
• -ma’naviy-ma’rifiy barkamolligini yuksaltirish;
• -kasbiy mahoratini shakllantirishda muhim omil bo‘lib xizmat qiladi.

Mazkur tizim nafaqat bilim va tajribani avloddan-avlodga yetkazish, balki yoshlarni ijodkorlik, tashabbuskorlik va yangicha fikrlashga yo‘naltirishda ham samarali vosita sifatida e’tirof etildi.

Tadbir davomida talababay ishlarni tashkil etishda innovatsion yondashuvlarni qo‘llash, shogirdlarning tashabbus va iqtidorini qo‘llab-quvvatlash, ularni zamonaviy mehnat bozori talablariga mos kasbiy tayyorgarlikka yo‘naltirish bo‘yicha bir qator aniq taklif va tavsiyalar bildirildi.

Ustozlarning tajribasi va shogirdlarning yangicha qarashlari uyg‘unlashganda, ta’lim jarayonida yangi natijalarga erishish mumkinligi alohida qayd etildi.

O‘quv-seminar ishtirokchilarida ustoz-shogird an’anasini rivojlantirishga bo‘lgan mas’uliyat va e’tibor yanada ortdi. Tadbir yakunida bildirilgan takliflar kelgusida universitetda ta’lim jarayonini yanada samarali tashkil etishga, yoshlarni barkamol, mustaqil fikrlaydigan mutaxassis sifatida shakllantirishga xizmat qiladi.