Farg`ona davlat universiteti

NAVOIY TAVALLUDIGA BAG‘ISHLANGAN ADABIY-MA’RIFIY TADBIRLAR

Buyuk mutafakkir, so‘z mulkining sultoni Alisher Navoiy tavalludiga bag‘ishlab, Axborot-resurs markazi qoshidagi “Kitobxonlar klubi” tashabbusi bilan adabiy-ma’rifiy tadbir tashkil etildi.

Mazkur tadbirning asosiy maqsadi yoshlar va kitobxonlar orasida Alisher Navoiy ijodini keng targ‘ib etish, uning boy adabiy merosi, yuksak ma’naviy va ma’rifiy g‘oyalarini chuqurroq anglashga undashdan iborat bo‘ldi.

Tadbir davomida buyuk mutafakkirning hayoti va ijodiy faoliyatiga oid qiziqarli ma’lumotlar berilib, uning asarlarida mujassam bo‘lgan insonparvarlik, adolat, ilm-ma’rifat va komil inson g‘oyalari atroflicha yoritib berildi. Ishtirokchilar tomonidan Alisher Navoiy g‘azal va she’rlari ifodali o‘qilib, adabiy kechaga alohida ruh va mazmun bag‘ishladi.

Shuningdek, tadbir doirasida Alisher Navoiy asarlari hamda u haqidagi ilmiy va badiiy adabiyotlardan iborat kitoblar ko‘rgazmasi tashkil etilib, tashrif buyurgan kitobxonlarda katta qiziqish uyg‘otdi. Ko‘rgazma ishtirokchilarni Navoiy merosi bilan yanada yaqindan tanishishga undadi.

Tadbir yakunida faol ishtirok etgan kitobxonlar va ijodkor yoshlar tashkilotchilar tomonidan munosib taqdirlandi, bu esa ularni kelgusida ham bunday ma’naviy-ma’rifiy tadbirlarda faol qatnashishga ruhlantirdi.

Mazkur adabiy-ma’rifiy tadbir ishtirokchilarda milliy adabiyotimizga bo‘lgan hurmat va e’tiborni kuchaytirib, Alisher Navoiy ijodining bugungi avlod tarbiyasidagi beqiyos ahamiyatini yana bir bor namoyon etdi.