Farg‘ona futbol muxlislari uchun yana bir qiziqarli va mazmunli o‘yin bo‘lib o‘tdi. PFK FarDU jamoasi o‘z maydonida mamlakatimizning eng nomdor klublaridan biri — Neftchi Farg‘ona bilan o‘rtoqlik uchrashuvida kuch sinashdi.
Farg‘onadagi Istiqlol stadioni yashil maydonida, muxlislarsiz yopiq tarzda o‘tkazilgan bahs shiddatli va murosasiz ruhda kechdi. Har ikkala jamoa ham maydonga g‘alaba uchun tushgani yaqqol sezilib turdi.
Uchrashuvning dastlabki daqiqalarida tajribali “Neftchi” jamoasi tashabbusni o‘z qo‘liga olib, hisobni ochishga muvaffaq bo‘ldi. Bu gol o‘yinga yanada jon bag‘ishladi va “FarDU” futbolchilarini tezroq javob qaytarishga undadi.
Ko‘p o‘tmay, “FarDU” jamoasi o‘zining hujumkor va jips o‘yinini namoyish etib, muvozanatni tikladi. “Yo‘lbarslar” laqabi bilan tanilgan jamoa vakillari raqib darvozasiga aniq zarba yo‘llab, hisobni 1:1 ko‘rinishiga keltirdi.
Shundan so‘ng uchrashuv yanada keskin tus oldi — har ikkala jamoa ham bir nechta xavfli vaziyatlar yaratgan bo‘lsa-da, hisob o‘zgarmadi.
O‘yin yakuniga ko‘ra 1:1 hisobidagi durang qayd etildi. Ushbu natija yosh va intiluvchan “FarDU” jamoasi uchun katta ruhiy yutuq sifatida baholanishi mumkin. Tajribali va ko‘p karra chempion bo‘lgan “Neftchi”ga qarshi munosib o‘yin namoyish etish jamoaning salohiyati yuqori ekanini yana bir bor isbotladi.
Uchrashuvdan so‘ng Bahodirjon Shermuhammadov futbolchilar bilan kiyim almashtirish xonasida uchrashib, ularning harakatlarini yuqori baholadi. Klub rahbari jamoani ushbu natija — g‘alabaga teng durang bilan tabriklab, kelgusi o‘yinlarda yanada katta muvaffaqiyatlarga erishishiga ishonch bildirdi.
Ushbu uchrashuv “FarDU” jamoasining o‘sish yo‘lida muhim bosqichlardan biri bo‘ldi. Oldinda esa yanada mas’uliyatli bahslar va yangi sinovlar kutmoqda.
Barcha huquqlar himoyalangan. © 2026
Iltimos, kuting. Yuklanyapti...
