Farg`ona davlat universiteti

DASTLABKI HIMOYA

Farg‘ona davlat universiteti magistratura bo‘limi tomonidan bitiruvchi magistrantlarning dissertatsiya ishlarini dastlabki himoya qilish jarayonlari yuqori saviyada tashkil etilmoqda. Ushbu jarayon ilmiy izlanishlarning sifatini oshirish, yosh tadqiqotchilarning bilim va ko‘nikmalarini baholash hamda ularni keyingi bosqichlarga puxta tayyorlashda muhim ahamiyat kasb etadi.

Universitetning jismoniy madaniyat fakulteti, jismoniy tarbiya nazariyasi kafedrasida “Jismoniy tarbiya va sport mashg‘ulotlari nazariyasi va metodikasi” mutaxassisligi bo‘yicha tahsil olayotgan bitiruvchi magistrantlarning dissertatsiya ishlari dastlabki himoyadan o‘tkazildi.

Mazkur jarayonda magistrantlar o‘z ilmiy tadqiqotlari natijalarini taqdim etib, tanlagan mavzularining dolzarbligi, ilmiy yangiligi va amaliy ahamiyatini asoslab berdilar. Kafedra professor-o‘qituvchilari va ilmiy rahbarlar tomonidan har bir ish atroflicha muhokama qilinib, taklif va tavsiyalar berildi. Bu esa tadqiqotlarni yanada takomillashtirish va yakuniy himoyaga sifatli tayyorlash imkonini yaratadi.

Dastlabki himoya nafaqat bilimlarni sinovdan o‘tkazish, balki ilmiy fikrlash, tahlil qilish va o‘z nuqtai nazarini asoslab bera olish ko‘nikmalarini rivojlantirishga xizmat qilmoqda. Shuningdek, bu jarayon magistrantlarning ilmiy salohiyatini namoyon etish va ularni kelajakdagi ilmiy faoliyatga rag‘batlantirishda muhim bosqich hisoblanadi.

Ta’kidlash joizki, bugungi kunda universitetda ilm-fan va ta’lim integratsiyasiga alohida e’tibor qaratilib, yosh mutaxassislarni yetuk kadrlar sifatida shakllantirish yo‘lida tizimli ishlar olib borilmoqda.